Cultura cantica ha ina fetg liunga e ferma tradiziun a Trun. Era sch’il Chor viril da Trun, il Chor viril e mischedau da Zignau, il Chor viril da Darvella ed il Chor d’affons da Trun existan buca pli – decennis alla liunga han quellas formaziuns marcau la cultura cantica en ed ordvart vischnaunca. Ina formaziun ha surviviu: il Chor cecilian da Trun. E Trun astg’ins era numnar la sedia dil cantus firmus surselva. Trun han il cant e la musica giu da vegl enneu ina gronda muntada e tradiziun. Quei ei d’attribuir a capavels ed engaschai dirigents che han giu las habilitads musicalas da motivar cantaduras e cantadurs per quei niebel art, aschia era tier il Chor cecilian.
Igl onn da fundaziun dil Chor cecilian ei buca enconuschents. Nus supponin che quei seigi stau alla sava dil 20 avel tschentaner. Probablamein ha il Chor cecilian cantau dall’entschatta enneu en formaziun mischedada, Quei era da quei temps nunusitau. Il pensum dil Chor ei da cultivar il cant liturgic ed embellir las fiastas da baselgia. Dasperas vegn era il cant profan tgiraus ed il chor semesira adina puspei cun success a fiastas da cant cecilianas e profanas.
Da present dumbra il chor 35 cantaduras e cantadurs e vegn presidiaus da Rico Schwarz e dirigius da Gion Gieri Tuor. 1999 ha il Chor cecilian ensemen cun il Chor mischedau da Zignau giu organisau la Fiasta da cant ceciliana per la Cadi e 2012 la Fiasta da cant cantunala dil Grischun.
Sopran
Bundi Steiner Flurina, Cadruvi Annina, Cadruvi Gabriela, Degonda Rita, Guldimann Carla, Maissen Zita, Maissen Matilda, Nay Erna, Perl Esther, Rensch Maria, Schmed Marielle, Simeon Tania, Tambornino Gabriela, Tomaschett Denise, Bundi Claudia
Alt
Bundi Giusepina, Bundi Steiner Seraina, Decurtins Sandra, Flepp Yvonne, Lanz Rosy, Pelican Crista, Quinter Blandina, Rensch Letizia, Schnider Judith, Simeon Justina, Wolf Josefa, Wolf Manuela, Gabriela Riedi, Giusepina Lombriser
Tenor
Cagienard Otto, Defuns Luis, Rensch Clau, Schwarz Rico, Tomaschett Rinaldo
Bass
Decurtins Fridolin, Lombriser Clau, Rensch Christoffel, Simeon Benedetg, Venzin Ramun
Gion Gieri Tuor
Siu studi sco dirigent ha Gion Gieri terminau al conservatori da Lucerna. Ulteriuras scolaziuns ha el frequentau tier Erich Widl a Turitg en la casa d’opera, tier Laszlo Pogany a Feldkirch e György Selmeczi a Budapest, sco era tier Andreas Spörri a Basilea. – Gion Gieri ha dirigiu differents chors e musicas da stuors en la Surselva. Aschia stat dapi il 2006 era igl orchester ed il chor opera viva sut sia bitgetta.Fiasta da cant
districtuala dalla Surselva
15 da zercladur 2024 a Trun
Trun cun ses 1200 habitontas e habitonts ei in liug che porscha relaziuns idealas per ina fiasta da cant – ina vischnaunca cun gronda tradiziun e cultura da cant e musica, in liug cumpact cun ina buna infrastructura.
